На 25 јануари концерт за роденденот на Тоше Проески

Меѓу гостите што ќе ги видиме во салата „Борис Трајковски“ ќе бидат и Антонија Шола, Наум Петревски, кој ќе настапи со групата „Синтезис“, хрватскиот композитор Мирослав Рус и многу други. Ќе биде промовирана и новата песна на Тоше „Наслони главу на моје раме“, чиј целосен автор е Нено Нинчевиќ

Традиционално и овој 25 јануари со меморијален концерт ќе биде одбележан роденденот на македонската музичка легенда Тоше Проески. Неговите многубројни обожаватели од Македонија, но и од целиот Балкан и овој пат ќе се соберат во салата „Борис Трајковски“ во Скопје, а на сцената ќе настапат познати пејачи од регионот. Сепак, бројот на учесниците ќе биде помал од оној на претходните два концерти посветени на него, бидејќи членовите на клубовите на обожаватели на Проески имаат желба повеќе да го слушаат гласот на својот миленик. Како и досега концертот ќе има хуманитарен предзнак, за да се продолжи делото на Тоше.

Според реакциите на членовите на клубот на обожаватели „Тоше Проески“, 25 јануари е многу значаен ден во нивниот животот, па затоа сите ќе дојдат во салата „Борис Трајковски“ да го прослават денот на неговото раѓање.

- Ги правиме последните подготовки за концертот по повод роденденот на Тоше, што ќе се одржи во салата „Борис Трајковски“ на 25 јануари, неговиот роденден. Ќе има гости, естрадни уметници од земјава, но и од целиот Балкан, а листата сй уште не е целосна. Најверојатно на сцената ќе ги видиме Антонија Шола, Наум Петревски, кој ќе настапи со групата „Синтезис“, но ќе има и многу други познати гости, чии имиња ќе ги објавиме наскоро. Ќе биде промовирана и новата песна на Тоше „Наслони главу на моје раме“, чиј целосен автор е Нено Нинчевиќ, снимена летото 2007 година во Хрватска - ни рече Славен Ристовски, од фондацијата „Тодор Проески“.

Тој додаде дека огромна помош во организацијата на концертот имаат од хрватскиот композитор Мирослав Рус, големиот пријател на Тоше, но и на цела Македонија, кој исто така најверојатно ќе присуствува на оваа манифестација.

- Исто така ќе бидат промовирани и неколку нови авторски песни на Тоше Проески, што ќе ги слушнеме во негова изведба, а во план е и промовирање на дивиди-издание со неговите нови мелодии. Концертот директно ќе го пренесува некоја од македонските телевизии, а ќе го преземат и голем број станици од целиот Балкан - дополни Ристовски.

Организатори на концертот се фондацијата „Тодор Проески“, клубот на обожаватели „Тоше Проески“ и Министерството за култура на Република Македонија.

Спомен-куќата готова!

На веб-страницата на клубот на обожаватели на Тоше Проески во Хрватска: http://fanclubtoseproesvki.bloger.hr е објавена веста дека меморијалниот центар „Тоше Проески“ во Крушево свечено ќе биде отворен на 25 јануари 2011 година, на денот на раѓањето на трагично загинатата ѕвезда. Во спомен-куќата, која е направена според архитектонското решение на Дејан Секуловски, Дејан Спасеноски и Илија Божиноски, ќе се наоѓа макета на неговата родна куќа во Крушево и на музичкото студио од станот во скопската населба Злокуќани. Во посебен музејски дел ќе се чуваат неговите лични предмети, колекцијата на икони и многубројните награди.

Кон***сот за изградбата на Меморијалниот центар пред три години го распиша Министерството за култура на Македонија и, од десетте пријавени решенија, избрано е она во форма на крст.

Центарот се протега на 870 квадратни метри, покривот е застаклен и е многу специфичен, а изработен е во странство.

Караоке-забава за Јоце
Во знак на неговата хуманост, во саботата вечерта, на прославата на католичкиот Божиќ, обожавателите на Тоше Проески организираа караоке-забава во скопското кафуле „Кафе-кафе“, каде што секој можеше да ја испее својата омилена песна од неговиот репертоар! Собраните средства беа донирани за помош на Јоце, кој боледува од церебрална парализа, кој исто така беше гостин на оваа средба во спомен на балканскиот славеј. Инаку, Тоше секој 25 декември традиционално одржуваше големи хуманитарни концерти - еднаш на Скопскиот саем, а сите други во Универзалната сала.

http://novamakedonija.com.mk/NewsDetal.asp?vest=1229102229493&id=50&prilog=0&setIzdanie=22171